- 149 -

1347. Okt. 24. Liegnitz.

Herzog Wenzel verschreibt der Stadt Liegnitz für dargeliehene 700 Mark die Ausbeute der Bergwerke Niclasdorf, Goldberg, Wandros und Strachwitz als Pfand.

Wyr Wenczlab von gotyz genadyn herczog von Slesien vnd her czu Legnicz tvn czu wyssen allen den, dy dysen brif sen oder horen lesen, daz wyr ansen dy trewe vnd grose merkliche hulfe vnser getrewen burgern czu Legnicz, dy sy vns tvn czu dyser czeit vnd for vns gelden sechz hvndyrt mark, daz sy sich der gutlich vnd liplich mvgen derholen vnd ane schaden do von kvmen, dorvmme vorsetze wyr in czv eynem rechten pfande alle vnser vrbar, dy wyr in ouch vor haben vorsatzet, vnd ouch dorvmme vorsetze wyr in nv dor czu alle bruche, alle beten mit aller herschaft, mit allem rechte, nicht vs czu nemen, alz sy vns angehoren, czv Nyclasdorf, czvm Goltberg, czv Wandros, czv Strachwycz oder wo berkwerk sin in vnsem lande, odyr wellicherley dy sin, dy yzczvnt sin odyr hernoch werden, vnd ouch czv dem allem vorsetze wyr in sechz marg markrechtyz czv Nyclasdorf alle wochin vf czv hebin, do sy sullen antretyn an sende Jacobs tag der nvnest kvmt, vnd alzo, daz dy seibin vnse burger czu Legnicz sullen antretin an dy vorgesprochen vnse vrbar von sende Mertins tag, der nv nest kvmt vber czwey jar vnd vfhebin also lange, biz daz sy wyder gekevfen dryhvndert mark vnsez geschosses, als wyr in ouch in eynem andern briue vorschriben habn, in dem daz vollkomlicher beschriben stet vnd ouch dyse hy vorgenanten sechzhvndert mark genczlich vnd gar vf gehebin vnd ouch schaden, wy vil dez dorvf get. Dor czu gelob wyr in, ob wyr dy vorgesprochen vrbar oder dy ebenanten sechz mark markrechtyz ymand vorkovften oder vorsetzten, dyselben, dy sy kovften sullen noch enturren er sych mit nicht vnderwynden, es in sy den, daz vnse ebenanten burger genczlich vnd gar alle yr gelt, alz vorbeschriben stet, erhebin, ez sy heubt gut odyr schaden vnd sy ouch mit yrme guten wyllen. Ouch gelob wyr in, denselben vnsen getrewen burgern czu Legnicz, sy nicht czu vorseczen, noch czu biten vmme keynerley gelt also lange, biz daz sy dy sechzhundert mark mit dem schaden, der dor vf get, genczlich vnd gar vf gehebin. Ouch gelob wyr in, sy czu lassen bey allem yrme rechte vnd allen genaden, dy sy von vnsen eidern oder vnsen vorvaren habn gehabt vnd sy nicht czu beswerin svnder getrevlichen denken vor der stat not vor arme vnd vor riche vnd vngewonlicher sach vnd bete sy erlasen. Ouch gelob wyr, sy czu lassen bey allen hofeczugen, dy si werden tvn czu Niclasdorf oder wo es sy vmme schult vmme totslege vnd vmme wunden vnd vmme alle sache ane daz berkwerk antrit, also daz man dy sal richten vnd teydingen czu Legnicz in der stat, vor vns oder vnsem houerichter als von alder gewest ist. Dor vmme wyr herczog Ludwyk gelobin vor vnsen bruder herczog Wenczlab vnde mit ym bey vnsen guten trewen ane alle argelist, den getruwen vnd erbern luten, burgermester, ratluten der gemeyne, arme vnd rich czu Legnicz, das in allen dyse vorbeschriben sache stete vnd gancz vnd vnczubrochlich von vnsem vorgenanten bruder werde gehalden, wo ober dez nicht gesche oder in bruch wurde an keyner der vorbeschriben sachen, so gelob wyr herzogen ebenanten in guten trewen ane argelist in dy stat czu Legnicz czu kvmen vnd eyn recht inleger czu halden vnd nicht dorvz czu kvmen, byz daz derselbe bruch oder bruche werden gewandelt oder wydertan, daz den vorgenanten burgern czu Legnicz doran genuge vnd czu eyme beczuge aller dyr vorbeschryben rede vnd sachen, geb wyr von vnsen rechten gewyssen dysen brif vorsygelt mit vnsern anhangenden ingesigeln. Der ist gegebin czu Legnicz an der nesten mitwochen vor Symonis et Jude der czwelfboten, in dem yar. alz man schribet noch gotyz geburt tusent iar drihundert jar in dem syben vnd fyrezigistem ior.

O. d. St. L. No. 65. An Pergamentstreifen die Wappensiegel der Herzoge, Ludwigs in dunklem, Wenzeslaws in rothem Wachs.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866